Er það söginni að kenna þegar maður sagar sig í puttann?

"Slíkt getur vissulega styrkt vináttubönd og haft margs konar jákvæð áhrif en dökkar hliðar þessara samskiptamáta eru sífellt að koma betur í ljós." - úr greininni á mbl.is

 Það er miður þegar að vettvangi eða tóli er kennt um ákveðinn vanda. Ég veit þó ekki hvort fréttamaður greinarinnar sem ég blogga nú um ætlar sér slíkt eður ei - en maður fær á tilfinninguna að internetið sé aðal vandinn, fremur en fólkið sem leggur í einelti og hvernig félagslegu umhverfi þess og þolenda þeirra er háttað. 

 Það sem framkallar vandann er ekki internetið. Internetið er einungis miðill sem einfaldar okkur samskipti og eykur möguleika okkar á þeim til muna. Með þessu tóli, rétt eins og öðrum öflugum tólum þarf að auka fræðslu og eftirlit svo ekki hljótist skaði af. Því má rekja vandann sem greinin fjallar um til eftirfarandi þátta fremur en internetsins:

 - Börn á internetinu sæta ekki nægilegu eftirliti
 - Börnin hafa ekki fengið nægilega fræðslu um hvernig skuli haga sér á netinu og hvernig skuli bregðast við vandamálum, sem dæmi einelti
 - Börnunum hefur ekki verið almennilega kennt að verja sig og sitt svæði með þeim tólum sem í boði eru, sem dæmi öryggisstillingum á Facebook

Foreldrar verða að gera sér grein fyrir þörfinni á aukinni fræðslu og eftirliti þegar heimurinn tekur þess háttar stakkaskiptum sem internetið hefur í för með sér. Internetið opnar á möguleika einstaklingsins til að eiga í samskiptum við hvern sem er, hvenær sem er - svo lengi sem viðkomandi sé tengdur netinu. Því er nú um mun meiri þörf á fræðslu þeirra og eftirliti en áður hefur verið. Þó skulu foreldrar ávallt muna að börn eru í upplýsingaleit og er það þáttur í þeirra þroskaferli. Því skulu foreldrar fara varlega með öll boð og bönn, og beita frekar fræðslu og eftirliti eftir fremstu getu. 

Ég vitna í grein mína í Fréttablaðinu en þar fjalla ég nánar um samskipti ungmenna á Facebook, sem einnig er hægt að yfirfæra á aðra svipaða samskiptamiðla á netinu.

Greinina er að finna í tenglinum hér fyrir neðan:

http://vefblod.visir.is/index.php?s=4961

 

Dökkar hliðar netsins fram í dagsljósið